Հարկային փոփոխությունների նախագծի համառոտ նկարագրություն
«Հայաստանի Հանրապետության հարկային օրենսգրքում փոփոխություններ եւ լրացումներ կատարելու մասին» ՀՀ օրենքի նախագիծն արդեն պատրաստ է: Ազգային ժողովն այն կքննարկի 2019-ի հունվարին և վեց ամիս անց այն ուժի մեջ կմտնի:
Ստորև համառոտ ներկայացնում ենք հիմնական փոփոխությունները՝
1 - Շրջանառության հարկի շեմը մնում է անփոփոխ - 115 մլն դրամ
2 - 2020 թվականից մինչև 20 մլն շրջանառություն ունեցող ձեռնարկությունները կազատվեն հարկերից:
Անհատ ձեռնարկատեր չհանդիսացող ֆիզիկական անձինք հարկման այս համակարգից կարող են օգտվել առանց անհատ ձեռնարկատեր հաշվառվելու, եթե զբաղվում են Օրենսգրքով սահմանվող՝ գործունեության պարզունակ տեսակներով:
Հարկման համակարգի այս վերանայումների շրջանակներում նախատեսվում է սահմանել, որ՝
ա. միկրոձեռնարկատիրության սուբյեկտ չեն կարող համարվել Երեւան քաղաքի վարչական սահմաններում, ինչպես նաեւ Երեւան քաղաքի վարչական սահմաններից դուրս՝ առեւտրի իրականացման վայրերում, առեւտրի կենտրոններում եւ տոնավաճառներում առեւտրական (առք ու վաճառքի) գործունեությամբ զբաղվող կազմակերպություններն ու անհատ ձեռնարկատերերը:
բ. միկրոձեռնարկատիրության սուբյեկտները իրենց գործունեության մեջ, որպես վարձու աշխատող կարող են ներգրավել ֆիզիկական անձանց առանց սահմանափակումների, որոնց վճարվող եկամուտներից եկամտային հարկը հաշվարկվելու է հինգ հազար դրամի չափով:
3 - Եկամտային հարկը կհաշվարկվի մեկ միասնական դրույքաչափով: 2019 թվականի հուլիսի 1-ից այն կսահմանվի 23 տոկոս, այնուհետեւ եկամտային հարկի դրույքաչափը մինչեւ 2023 թվականը աստիճանաբար կնվազեցվի մինչև 20 տոկոս:
Առավել մանրամասն նյութի հետ կարող եք ծանոթանալ այստեղ:
